எதிர்மறையான ஆன்லைன் அனுபவங்கள் தொடர்பாக உங்கள் பிள்ளைக்கு உதவும் விதம்

1. தவறாக ஏதோவொன்று நடந்திருப்பதை அடையாளம் காணுங்கள்

தவறாக ஏதேனும் நடந்தால் எல்லா பிள்ளையும் நேரடியாகத் தங்கள் பராமரிப்பாளரிடம் செல்வதில்லை. சில பெற்றோர்கள் தங்கள் பிள்ளைக்கு ஆன்லைனில் எதிர்மறையான அனுபவமிருப்பதைப் பற்றி முதன்முதலில் ஆசிரியரிடமிருந்தோ இன்னொரு பெற்றோரிடமிருந்தோ கேள்விப்படுகிறார்கள். பிற பெற்றோர்கள் தங்கள் பிள்ளையின் சாதனத்தில் விசித்திரமான அல்லது தகாத மெசேஜ்கள், கருத்துகள் அல்லது படங்களைக் கவனிக்கலாம். உங்கள் பிள்ளை உடனடியாக உங்களிடம் வரவில்லை என்றால் வருத்தப்படவோ கோபப்படவோ செய்யாதீர்கள். நடந்த விஷயங்களை நினைத்து அவர்கள் வெட்கப்படலாம் அல்லது பயப்படலாம் அல்லது உங்களிடம் சொன்னால் நீங்கள் எப்படி நடந்துகொள்வீர்கள் என்று கவலைப்படலாம்.

உங்கள் பிள்ளை ஒன்றைப் பற்றி கவலையாக இருக்கலாம் அல்லது வருத்தமாக இருக்கலாம் என்பதற்கான அறிகுறிகளை அடையாளம் காண முயற்சி செய்யுங்கள். உங்கள் பிள்ளையிடத்தில் ஏதோவொன்று இயல்புக்கு மாறாக வித்தியாசமாக தோன்றினால், அவர்களைப் பற்றி உங்களுக்கே நன்குத் தெரியும், ஆனால் பொதுவான அறிகுறிகளில் பின்வருவன அடங்கும்:

• தலைவலி அல்லது வயிற்று வலி
• தூங்குவதில் சிக்கல்
• பசி ஏற்படுவதில் மாற்றங்கள்
• விவரிக்க முடியாத சோகம், எரிச்சல், கவலை, பதட்டம்
• ஆன்லைனில் நேரத்தைச் செலவிட்ட பிறகு மன உளைச்சல்
• அவர்கள் சாதனங்களைப் பயன்படுத்துவதைத் தவிர்த்தல் அல்லது அவர்கள் வழக்கத்திற்கு மாறாக ஆன்லைனில் செய்யும் விஷயங்களை இரகசியம் காத்தல்
• பள்ளிக்குச் செல்ல பயப்படுதல் அல்லது சமூக சூழ்நிலைகளைத் தவிர்த்தல்

UNICEF: பிள்ளைகளின் மன உளைச்சல் அறிகுறிகளைக் கண்டறியும் வழிகள்

தவறாக ஒரு விஷயம் நடந்திருப்பதாக நீங்கள் சந்தேகித்தால், உங்கள் பிள்ளை உங்களிடமோ, மற்றொரு நம்பகமான பெரியவரிடமோ எப்போதும் பேசலாம் என்பதையும், எதுவாக இருந்தாலும் நீங்கள் அவர்களுக்கு உதவ இருக்கிறீர்கள் என்பதையும் நினைவூட்டுங்கள்.

2. உங்கள் பிள்ளைக்கு ஆறுதல் வார்த்தை கூறுங்கள்

உங்கள் பிள்ளை ஆன்லைனில் தகாத அல்லது வருத்தமளிக்கும் ஒன்றை அனுபவித்திருப்பதைக் கண்டறிவது ஒரு பெற்றோராக மிகவும் கடினமான விஷயமாக இருக்கலாம். ஆனால் நினைவில் கொள்ளுங்கள், நீங்கள் அமைதியாக, உங்கள் பிள்ளை சொல்வதை நீங்கள் செவிமடுக்கிறீர்கள், உதவியாக இருக்கிறீர்கள் என்ற உணர்வை உங்கள் பிள்ளையிடம் ஏற்படுத்தினால், அவர்கள் இப்போதும் எதிர்காலத்திலும் உங்களிடம் வெளிப்படையாக இருக்கும் வாய்ப்புகள் அதிகம்.

அமைதியாக இருங்கள்: பதிலளிப்பதற்கு முன் மூச்சை உள்ளிழுத்து வெளிவிடுங்கள். உங்கள் பிள்ளை உங்கள் உணர்ச்சி வெளிப்பாட்டை கவனித்துக் கொண்டிருக்கும், எனவே நீங்கள் அதிர்ச்சியாகவோ, கோபமாகவோ அல்லது வருத்தமாகவோ இருந்தாலும் கூட அமைதியாக இருக்க முயற்சி செய்யுங்கள்.

உங்கள் பிள்ளையைப் பாதுகாப்பாக வைத்திருக்க அவர்களின் சாதனத்தை திரும்பப் பெற்றுவிடுவது அல்லது இணைய அணுகலைத் துண்டித்து விடுவதே உங்கள் முதல் உள்ளுணர்வாக இருக்கும், ஆனால் அத்தகைய செயல்பாடுகள் அவர்கள் தண்டிக்கப்படும் உணர்வை அவர்களுக்குக் கொடுக்கும், எனவே அவர்கள் எதிர்காலத்தில் உங்களிடம் வருவதற்கான வாய்ப்புகள் குறைவாகவும் இருக்கும்.

செவிமடுங்கள்: உங்கள் பிள்ளைக்கு உங்கள் முழு கவனத்தையும் கொடுங்கள், அவர்கள் சொல்வதைக் கவனமாகக் கேளுங்கள், என்ன நடந்தது என்பதை அவரே விளக்க அனுமதியுங்கள். உங்கள் பிள்ளையின் கவலைகளை தீவிரமாக எடுத்துக் கொள்ளுங்கள், இடைமறிப்பதைத் தவிருங்கள், உடனே எந்த முடிவுக்கும் வராமல் இருக்க முயற்சி செய்யுங்கள்.

உங்கள் பிள்ளை உங்களுக்குப் பரிச்சயமில்லாத செயலிகள், கேம் பற்றிச் சொன்னாலோ அல்லது உணர்ச்சி வெளிப்பாட்டை பயன்படுத்தினாலோ, அதனை விளக்குமாறு அல்லது காண்பிக்குமாறு அவர்களிடம் சொல்லுங்கள். நீங்கள் முறையாகப் புரிந்துகொள்ள விரும்புகிறீர்கள் என்றும், அப்போதுதான் உங்களால் முடிந்தவரை அவர்களுக்கு உதவ முடியும் என்றும் அவர்களிடம் சொல்லுங்கள்.

அவர்கள் விளைக்கமாகப் பதிலளிக்கும் வகையிலான கேள்விகளைக் கேளுங்கள், எடுத்துக்காட்டாக: "என்ன நடந்தது என்பதைக் காண்பிக்க முடியுமா?", "அது உனக்கு எப்படிப்பட்ட உணர்வைத் தந்தது?".

ஆறுதல் வார்த்தைக் கூறுங்கள்: உங்களிடம் வருவதன் மூலம் அவர்கள் சரியானதையே செய்துள்ளார்கள் என்பதையும் அவர்கள் சிக்கலில் இல்லை என்பதையும் உங்கள் பிள்ளைக்குத் தெரியப்படுத்துங்கள். உங்களால் முடிந்த உதவியைச் செய்வீர்கள் என்று அவர்களுக்கு ஆறுதல் கூறுங்கள்.

எடுத்துக்காட்டாக: “நீ என்னிடம் சொன்னது நன்றென்றே நினைக்கிறேன். இதற்கு நீ காரணம் அல்ல, உனக்கு உதவவே நான் இங்கு இருக்கிறேன். நாம் ஒன்றாகச் சேர்ந்து இதனைச் சரிசெய்யலாம்."

3. நடவடிக்கை எடுங்கள்

சூழ்நிலையைப் பொறுத்து, விஷயமானது உங்கள் பிள்ளை சொல்வதை ஒருவர் செவிமடுத்தால் போதுமானது என்றளவு எளிதாக இருக்கலாம். மிகவும் தீவிரமான விஷயமாக ஒரு விஷயம் நிகழ்ந்திருந்தால், அது நிகழ்ந்த செயலி, உங்கள் பிள்ளையின் பள்ளி அல்லது காவல்துறையிடம் நிலைமையைப் புகாரளிக்க வேண்டியிருக்கும்.

முடக்கவோ, தடுக்கவோ, புகாரளிக்கவோ செய்யலாமா? சூழ்நிலைக்கு உதவியாக இருக்குமென உங்கள் பிள்ளை நினைப்பதைப் பற்றி அறிய அவர்களிடம் பேசுங்கள். எடுத்துக்காட்டாக, அவர்கள் ஒரு நபரை முடக்க வேண்டுமா, தடுக்க வேண்டுமா அல்லது புகாரளிக்க வேண்டுமா என்று அவர்களிடம் கேளுங்கள்.

பெரும்பாலான சமூக ஊடகச் செயலிகள், கேம்கள் மற்றும் செயலிகள் பல பாதுகாப்பு மற்றும் புகாரளிக்கும் அம்சங்களைக் கொண்டுள்ளன, இவை விஷயங்கள் தவறாக நடக்கும்போது உதவுகின்றன. பிள்ளைகள் (மற்றும் பெரியவர்கள்) என்னென்ன அம்சங்கள் உள்ளன மற்றும் அவை எவ்வாறு செயல்படுகின்றன என்பதைப் பற்றி அறியாமல் இருக்கலாம், எனவே இருவரும் ஒன்றாகச் சேர்ந்து வெவ்வேறு விருப்பங்களை உலாவி, ஒவ்வொன்றும் எது சம்பந்தப்பட்டது என்பதைப் பற்றி விவாதியுங்கள்.

எதிர்காலத்தில், உங்கள் பிள்ளை அவர்கள் பயன்படுத்தும் செயலிகள் மற்றும் அவர்கள் பதிவிறக்கம் செய்யும் ஏதேனும் புதிய செயலிகளில் உள்ள பயனர்கள் மற்றும் பகிர்வைப் புகாரளிப்பது, முடக்குவது அல்லது தடுப்பது எப்படி என்பதை உங்கள் பிள்ளை அறிந்திருப்பதும் முக்கியம்.

ஆதாரத்தை ஆவணப்படுத்துங்கள்: உங்கள் பிள்ளையின் எதிர்மறையான அனுபவத்துடன் தொடர்புடைய எந்தவொரு விஷயத்தையும் நீக்குவதே உங்கள் முதல் உள்ளுணர்வாக இருக்கலாம், ஆனால் சம்பவத்தைப் புகாரளிக்க நினைக்கிறீர்கள் என்றால், நடந்த விஷயங்களைக் காண்பிக்க உதவும் மெசேஜ்கள், படங்கள் அல்லது பதிவுகளைச் சேமிப்பது அல்லது ஸ்கிரீன்ஷாட் எடுப்பது முக்கியம்.

உதவி விவரங்கள்: Meta செயலியில் உள்ள புகாரளிக்கும் மற்றும் பாதுகாப்பு உதவி விவரங்கள் இங்கே உள்ளன.

• Meta பாதுகாப்பு மையம்
• Facebook இல் புகாரளித்தல்
• Instagram பாதுகாப்பு
• Instagram இல் புகாரளித்தல்

Take it Down என்ற இணையதளம், ஏதேனும் அந்தரங்கப் படங்களை அகற்றுவதற்கான வழிமுறைகளை வழங்குகிறது.

நீங்கள் ஒரு நிறுவனத்திடம் பிரச்சினையைப் புகாரளித்து, அவர்களிடமிருந்து பதிலைப் பெறவில்லை என்றாலோ, பிரச்சினை தீர்க்கப்பட்டதாக உணரவில்லை என்றாலோ, புகாரை அடுத்தக் கட்டத்திற்குக் கொண்டு செல்வது குறித்து கருத்தில் கொள்ளுங்கள். Facebook மற்றும் Instagram இல், உங்கள் புகாரின் நிலையைப் பார்க்கலாம், மேலும் பொருந்தக்கூடிய முடிவிற்குக் கூடுதல் மறுபரிசீலனைக் கேட்டிடலாம். பிள்ளைகளின் பாதுகாப்பை தீவிரமாக எடுத்துக் கொள்ள வேண்டிய பொறுப்பு இந்த நிறுவனங்களுக்கு உள்ளது என்பதை நினைவில் கொள்ளுங்கள்.

பள்ளி: உங்கள் பிள்ளையின் பள்ளியில் உள்ள மாணவர்கள் சம்பந்தப்பட்ட சம்பவம் என்றால், நீங்கள் பள்ளியுடன் பேச வேண்டியிருக்கலாம். நீங்கள் சேகரித்த ஏதேனும் ஆதாரத்தைப் பகிர்ந்து, உங்கள் பிள்ளைக்கு நிலைமையை மோசமாக்காத வகையில் அவர்கள் எவ்வாறு நடவடிக்கை எடுப்பார்கள் என்பதைப் பள்ளி அதிகாரிகளுடன் விவாதியுங்கள். எந்தவொரு ஒழுங்கு நடவடிக்கையும் வன்முறையற்றதாக இருக்க வேண்டும் மற்றும் நடத்தையைச் சரிசெய்வதில் கவனம் செலுத்துவதாக இருக்க வேண்டும் (அவமானப்படுத்துவதாகவோ தண்டனையாகவோ இருக்கக்கூடாது).

உங்கள் பிள்ளையின் பள்ளியில் ஆலோசகர் இருந்தால், உங்கள் பிள்ளைக்கு சிறந்த ஆதரவை வழங்கும் விதத்தைத் தீர்மானிக்க உங்கள் பிள்ளை அனுபவித்த விஷயங்களைப் பற்றியும் அவர்களிடம் பேசலாம்.

காவல்துறை அல்லது அவசர சேவைகள்: உங்கள் பிள்ளையின் பாதுகாப்பு குறித்து உங்களுக்கு ஏதேனும் கவலை இருந்தால், உடனடி உதவியை வழங்கக்கூடிய அதிகாரிகள் அல்லது உள்ளூர் குழந்தைகள் பாதுகாப்பு நிறுவனத்தைத் தொடர்புகொள்ள தயங்க வேண்டாம்.

4. வல்லுநர் உதவியை எப்போது பெறுவது

தகாத அல்லது தீங்கு விளைவிக்கும் ஒன்றை அனுபவிப்பது ஆழ்ந்த வருத்தத்தை ஏற்படுத்தும்.

உங்கள் பிள்ளைகள் எப்படி உணர்கிறார்கள் என்பதைத் தெரிந்துகொள்ள அவர்களிடம் தொடர்ந்து பேசுங்கள், அவர்களிடம் சாதரணமாக விசாரியுங்கள், ஆனால் சம்பவத்தைப் பற்றி நேரடியாகப் பேச வேண்டாம். சமூக ஊடகப் பயன்பாட்டிலிருந்து விலக்கி, நண்பர்களுடன் நேரத்தைச் செலவிடுவது, வாசிப்பது, விளையாட்டு விளையாடுவது அல்லது இசைக்கருவியைப் பயிற்சி செய்வது போன்ற பிற நேர்மறையான செயல்பாடுகளைக் கண்டறிய அவர்களுக்கு உதவுங்கள்.

உங்கள் பிள்ளையின் நடத்தை அல்லது மனநிலையில் சில காலத்திற்கு நீடிக்கும் மாற்றங்களை நீங்கள் கண்டால், நீங்கள் ஆரம்ப உடல்நலப் பராமரிப்பு வழங்குநரை அணுக வேண்டும்.

பல நாடுகளில் சிறப்பு உதவி எண் உள்ளது, அந்த எண்ணை உங்கள் பிள்ளை இலவசமாக அழைத்து, அடையாளம் காண முடியாதவராக இருந்து ஒருவருடன் பேசலாம். உங்கள் நாட்டில் உதவியைப் பெற Child Helpline International அல்லது United for Global Mental Health ஐப் பார்வையிடுங்கள்.

UNICEF: உங்கள் பதின்மவயதினrர் மனநல உதவியைக் கண்டறிய அவர்களுக்கு எப்போது உதவுவது