எதிர்மறையான ஆன்லைன் அனுபவங்கள் தொடர்பாக உங்கள் பிள்ளைக்கு உதவும் விதம்
UNICEF
நவம்பர் 20, 2024
உங்கள் பிள்ளைக்குப் பதிலளித்து அவருக்கு உதவுதற்கான 5 படிநிலைகள்.
பல பிள்ளைகளின் வாழ்வில் டிஜிட்டல் தொழில்நுட்பம் பெரும் பங்கு வகிக்கிறது. இது அவர்களுக்குக் கற்கும், தொடர்புகொள்ளும் மற்றும் கேளிக்கையில் ஈடுபடும் உலகைத் திறக்கிறது. ஆனால் ஆன்லைனில் இருப்பதில் ஆபத்தும் இருக்கிறது. பிள்ளைகள் ஆன்லைனில் கொடுமைப்படுத்துதல், துன்புறுத்தலை எதிர்கொள்ள நேரலாம், தகாத பகிர்வைப் பார்க்கலாம் அல்லது அவர்களுக்கு வருத்தம், அசௌகரியம் அல்லது பயத்தை ஏற்படுத்தக்கூடிய பிற அனுபவங்களைக் கொண்டிருக்கலாம். உங்கள் பிள்ளை இதனை ஆன்லைனில் எதிர்கொண்டால், அவர்களுக்கு உதவ நீங்கள் எடுக்கக்கூடிய ஐந்து படிநிலைகள் இதோ இங்கே.
1. தவறாக ஏதோவொன்று நடந்திருப்பதை அடையாளம் காணுங்கள்
தவறாக ஏதேனும் நடந்தால் எல்லாப் பிள்ளைகளும் நேரடியாகத் தங்கள் பராமரிப்பாளரிடம் செல்வதில்லை. சில பெற்றோர்கள் தங்கள் பிள்ளைக்கு ஆன்லைனில் எதிர்மறையான அனுபவமிருப்பதைப் பற்றி முதன்முதலில் ஆசிரியரிடமிருந்தோ இன்னொரு பெற்றோரிடமிருந்தோ கேள்விப்படுகிறார்கள். பிற பெற்றோர்கள் தங்கள் பிள்ளையின் சாதனத்தில் விசித்திரமான அல்லது தகாத மெசேஜ்கள், கருத்துகள் அல்லது படங்களைக் கவனிக்கலாம். உங்கள் பிள்ளை உடனடியாக உங்களிடம் வரவில்லை என்றால் வருத்தப்படவோ கோபப்படவோ செய்யாதீர்கள். நடந்த விஷயங்களை நினைத்து அவர்கள் வெட்கப்படலாம் அல்லது பயப்படலாம் அல்லது உங்களிடம் சொன்னால் நீங்கள் எப்படி நடந்துகொள்வீர்களோ என்று கவலைப்படலாம்.
உங்கள் பிள்ளை ஒன்றைப் பற்றிக் கவலையாக இருக்கலாம் அல்லது வருத்தமாக இருக்கலாம் என்பதற்கான அறிகுறிகளை அடையாளம் காண முயற்சி செய்யுங்கள். உங்கள் பிள்ளையிடத்தில் ஏதோவொன்று இயல்புக்கு மாறாக வித்தியாசமாகத் தோன்றினால், அவர்களைப் பற்றி உங்களுக்கே நன்றாகத் தெரியும், ஆனால் பொதுவான அறிகுறிகளில் பின்வருவன அடங்கும்:
- தலைவலி அல்லது வயிற்று வலி
- தூங்குவதில் சிக்கல்
- பசி ஏற்படுவதில் மாற்றங்கள்
- விவரிக்க முடியாத சோகம், எரிச்சல், கவலை, பதட்டம்
- ஆன்லைனில் நேரத்தைச் செலவிட்ட பிறகு மன உளைச்சல்
- அவர்கள் சாதனங்களைப் பயன்படுத்துவதைத் தவிர்த்தல் அல்லது அவர்கள் வழக்கத்திற்கு மாறாக ஆன்லைனில் செய்யும் விஷயங்களை இரகசியம் காத்தல்
- பள்ளிக்குச் செல்ல பயப்படுதல் அல்லது சமூகச் சூழ்நிலைகளைத் தவிர்த்தல்
UNICEF: பிள்ளைகளின் மன உளைச்சல் அறிகுறிகளைக் கண்டறியும் வழிகள்
தவறாக ஒரு விஷயம் நடந்திருப்பதாக நீங்கள் சந்தேகித்தால், உங்கள் பிள்ளை உங்களிடமோ, மற்றொரு நம்பகமான பெரியவரிடமோ எப்போதும் பேசலாம் என்பதையும், எதுவாக இருந்தாலும் நீங்கள் அவர்களுக்கு உதவ இருக்கிறீர்கள் என்பதையும் நினைவூட்டுங்கள்.
2. உங்கள் பிள்ளைக்கு ஆறுதல் வார்த்தை கூறுங்கள்
உங்கள் பிள்ளை ஆன்லைனில் தகாத அல்லது வருத்தமளிக்கும் ஒன்றை எதிர்கொண்டிருப்பதைக் கண்டறிவது ஒரு பெற்றோராக மிகவும் கடினமான விஷயமாக இருக்கலாம். ஆனால் நினைவில் கொள்ளுங்கள், நீங்கள் அமைதியாக, உங்கள் பிள்ளை சொல்வதை நீங்கள் செவிமடுக்கிறீர்கள், உதவியாக இருக்கிறீர்கள் என்ற உணர்வை உங்கள் பிள்ளையிடம் ஏற்படுத்தினால், அவர்கள் இப்போதும் எதிர்காலத்திலும் உங்களிடம் வெளிப்படையாக இருக்கும் வாய்ப்புகள் அதிகம்.
அமைதியாக இருங்கள்: பதிலளிப்பதற்கு முன் மூச்சை உள்ளிழுத்து வெளிவிடுங்கள். உங்கள் பிள்ளை உங்கள் உணர்ச்சி வெளிப்பாட்டைக் கவனித்துக் கொண்டிருக்கும், எனவே நீங்கள் அதிர்ச்சியாகவோ, கோபமாகவோ அல்லது வருத்தமாகவோ இருந்தாலும் கூட அமைதியாக இருக்க முயற்சி செய்யுங்கள்.
உங்கள் பிள்ளையைப் பாதுகாப்பாக வைத்திருக்க அவர்களின் சாதனத்தை திரும்பப் பெற்றுவிடுவது அல்லது இணைய அணுகலைத் துண்டித்து விடுவதே உங்கள் முதல் உள்ளுணர்வாக இருக்கும், ஆனால் அத்தகைய செயல்பாடுகள் அவர்கள் தண்டிக்கப்படும் உணர்வை அவர்களுக்கு ஏற்படுத்தும், எனவே அவர்கள் எதிர்காலத்தில் உங்களிடம் வருவதற்கான வாய்ப்புகள் குறைவாகவும் இருக்கும்.
செவிமடுத்திடுங்கள்: உங்கள் பிள்ளைக்கு உங்கள் முழு கவனத்தையும் கொடுங்கள், அவர்கள் சொல்வதைக் கவனமாகக் கேளுங்கள், என்ன நடந்தது என்பதை அவரே விளக்க அனுமதியுங்கள். உங்கள் பிள்ளையின் கவலைகளைத் தீவிரமாக எடுத்துக் கொள்ளுங்கள், இடைமறிப்பதைத் தவிர்த்திடுங்கள், உடனே எந்த முடிவுக்கும் வராமல் இருக்க முயற்சி செய்யுங்கள்.
உங்கள் பிள்ளை உங்களுக்குப் பரிச்சயமில்லாத செயலிகள், கேம் பற்றிச் சொன்னாலோ அல்லது உணர்ச்சி வெளிப்பாட்டைப் பயன்படுத்தினாலோ, அதனை விளக்குமாறு அல்லது காண்பிக்குமாறு அவர்களிடம் சொல்லுங்கள். நீங்கள் முறையாகப் புரிந்துகொள்ள விரும்புகிறீர்கள் என்றும், அப்போதுதான் உங்களால் முடிந்தவரை அவர்களுக்கு உதவ முடியும் என்றும் அவர்களிடம் சொல்லுங்கள்.
அவர்கள் விளைக்கமாகப் பதிலளிக்கும் வகையிலான கேள்விகளைக் கேளுங்கள், எடுத்துக்காட்டாக: "என்ன நடந்தது என்பதைக் காண்பிக்க முடியுமா?", "அது உனக்கு எப்படிப்பட்ட உணர்வைத் தந்தது?".
ஆறுதல் கூறுங்கள்: உங்களிடம் வருவதன் மூலம் அவர்கள் சரியானதையே செய்துள்ளார்கள் என்பதையும் அவர்கள் சிக்கலில் இல்லை என்பதையும் உங்கள் பிள்ளைக்குத் தெரியப்படுத்துங்கள். உங்களால் முடிந்த உதவியைச் செய்வீர்கள் என்று அவர்களுக்கு ஆறுதல் கூறுங்கள்.
எடுத்துக்காட்டாக: “நீ என்னிடம் சொன்னது நல்லது என்று நினைக்கிறேன். இதற்கு நீ காரணம் அல்ல, உனக்கு உதவவே நான் இங்கு இருக்கிறேன். நாம் ஒன்றாகச் சேர்ந்து இதனைச் சரிசெய்யலாம்."
3. நடவடிக்கை எடுங்கள்
சூழ்நிலையைப் பொறுத்து, விஷயமானது உங்கள் பிள்ளை சொல்வதைக் கேட்க ஒருவர் செவிமடுத்தால் போதும் என்ற அளவுக்கு எளிதாக இருக்கலாம். மிகவும் தீவிரமாக ஒரு விஷயம் நிகழ்ந்திருந்தால், அது நிகழ்ந்த செயலி, உங்கள் பிள்ளையின் பள்ளி அல்லது காவல்துறையிடம் நிலைமையைப் புகாரளிக்க வேண்டியிருக்கும்.
முடக்கவோ, தடுக்கவோ, புகாரளிக்கவோ செய்யலாமா? சூழ்நிலைக்கு உதவியாக இருக்குமென உங்கள் பிள்ளை நினைப்பதைப் பற்றி அறிய அவர்களிடம் பேசுங்கள். எடுத்துக்காட்டாக, அவர்கள் ஒரு நபரை முடக்க வேண்டுமா, தடுக்க வேண்டுமா அல்லது புகாரளிக்க வேண்டுமா என்று அவர்களிடம் கேளுங்கள்.
பெரும்பாலான சமூக ஊடகச் செயலிகள், கேம்கள் மற்றும் செயலிகள் பல பாதுகாப்பு மற்றும் புகாரளிக்கும் அம்சங்களைக் கொண்டுள்ளன, இவை விஷயங்கள் தவறாக நடக்கும்போது உதவுகின்றன. பிள்ளைகள் (மற்றும் பெரியவர்கள்) என்னென்ன அம்சங்கள் உள்ளன மற்றும் அவை எவ்வாறு செயல்படுகின்றன என்பதைப் பற்றி அறியாமல் இருக்கலாம், எனவே இருவரும் ஒன்றாகச் சேர்ந்து வெவ்வேறு விருப்பத்தேர்வுகளை உலாவி, ஒவ்வொன்றும் எது சம்பந்தப்பட்டது என்பதைப் பற்றி விவாதியுங்கள்.
எதிர்காலத்தில், உங்கள் பிள்ளை பயன்படுத்தும் செயலிகள் மற்றும் அவர் பதிவிறக்கம் செய்யும் ஏதேனும் புதிய செயலிகளில் உள்ள பயனர்கள் மற்றும் பகிர்வைப் புகாரளிப்பது, முடக்குவது அல்லது தடுப்பது எப்படி என்பதை உங்கள் பிள்ளை அறிந்திருப்பதும் முக்கியம்.
ஆதாரத்தை ஆவணப்படுத்துங்கள்: உங்கள் பிள்ளையின் எதிர்மறையான அனுபவத்துடன் தொடர்புடைய எந்தவொரு விஷயத்தையும் நீக்குவதே உங்கள் முதல் உள்ளுணர்வாக இருக்கலாம், ஆனால் சம்பவத்தைப் புகாரளிக்க நினைக்கிறீர்கள் என்றால், நடந்த விஷயங்களைக் காண்பிக்க உதவும் மெசேஜ்கள், படங்கள் அல்லது பதிவுகளைச் சேமிப்பது அல்லது ஸ்கிரீன்ஷாட் எடுப்பது முக்கியம்.
உதவி வளங்கள்: Meta செயலியில் உள்ள புகாரளிக்கும் மற்றும் பாதுகாப்பு உதவி வளங்கள் இங்கே உள்ளன.
Take it Down என்ற இணையதளம், ஏதேனும் அந்தரங்கப் படங்களை அகற்றுவதற்கான வழிமுறைகளை வழங்குகிறது.
நீங்கள் ஒரு நிறுவனத்திடம் பிரச்சினையைப் புகாரளித்து, அவர்களிடமிருந்து பதிலைப் பெறவில்லை என்றாலோ, பிரச்சினை தீர்க்கப்பட்டதாக உணரவில்லை என்றாலோ, புகாரை அடுத்த கட்டத்திற்குக் கொண்டு செல்வது குறித்து கருத்தில் கொள்ளுங்கள். Facebook மற்றும் Instagram இல், உங்கள் புகாரின் நிலையைப் பார்க்கலாம், மேலும் பொருந்தக்கூடிய முடிவிற்குக் கூடுதல் மறுபரிசீலனை கேட்டிடலாம். பிள்ளைகளின் பாதுகாப்பைத் தீவிரமாக எடுத்துக் கொள்ள வேண்டிய பொறுப்பு இந்த நிறுவனங்களுக்கு உள்ளது என்பதை நினைவில் கொள்ளுங்கள்.
பள்ளி: உங்கள் பிள்ளையின் பள்ளியில் உள்ள மாணவர்கள் சம்பந்தப்பட்ட சம்பவம் என்றால், நீங்கள் பள்ளியுடன் பேச வேண்டியிருக்கலாம். நீங்கள் சேகரித்த ஏதேனும் ஆதாரத்தைப் பகிர்ந்து, உங்கள் பிள்ளைக்கு நிலைமையை மோசமாக்காத வகையில் அவர்கள் எவ்வாறு நடவடிக்கை எடுப்பார்கள் என்பதைப் பள்ளி அதிகாரிகளுடன் விவாதியுங்கள். எந்தவொரு ஒழுங்கு நடவடிக்கையும் வன்முறையற்றதாக இருக்க வேண்டும் மற்றும் நடத்தையைச் சரிசெய்வதில் கவனம் செலுத்துவதாக இருக்க வேண்டும் (அவமானப்படுத்துவதாகவோ தண்டனையாகவோ இருக்கக்கூடாது).
உங்கள் பிள்ளையின் பள்ளியில் ஆலோசகர் இருந்தால், உங்கள் பிள்ளைக்கு சிறந்த ஆதரவை வழங்கும் விதத்தைத் தீர்மானிக்க உங்கள் பிள்ளை அனுபவித்த விஷயங்களைப் பற்றியும் அவர்களிடம் பேசலாம்.
காவல்துறை அல்லது அவசர சேவைகள்: உங்கள் பிள்ளையின் பாதுகாப்பு குறித்து உங்களுக்கு ஏதேனும் கவலை இருந்தால், உடனடி உதவியை வழங்கக்கூடிய அதிகாரிகள் அல்லது உள்ளூர் குழந்தைகள் பாதுகாப்பு நிறுவனத்தைத் தொடர்புகொள்ளத் தயங்க வேண்டாம்.
4. வல்லுநர் உதவியை எப்போது பெறுவது
தகாத அல்லது தீங்கு விளைவிக்கும் ஒன்றை எதிர்கொள்வது ஆழ்ந்த வருத்தத்தை ஏற்படுத்தும்.
உங்கள் பிள்ளைகள் எப்படி உணர்கிறார்கள் என்பதைத் தெரிந்துகொள்ள அவர்களிடம் தொடர்ந்து பேசுங்கள், அவர்களிடம் சாதரணமாக விசாரியுங்கள், ஆனால் சம்பவத்தைப் பற்றி நேரடியாகப் பேச வேண்டாம். சமூக ஊடகப் பயன்பாட்டிலிருந்து விலகி, நண்பர்களுடன் நேரத்தைச் செலவிடுவது, வாசிப்பது, விளையாட்டு விளையாடுவது அல்லது இசைக்கருவியைப் பயிற்சி செய்வது போன்ற பிற நேர்மறையான செயல்பாடுகளைக் கண்டறிய அவர்களுக்கு உதவுங்கள்.
உங்கள் பிள்ளையின் நடத்தை அல்லது மனநிலையில் சில காலத்திற்கு நீடிக்கும் மாற்றங்களை நீங்கள் கண்டால், நீங்கள் குடும்ப மருத்துவரை அணுக வேண்டும்.
பல நாடுகளில் சிறப்பு உதவி எண் உள்ளது, அந்த எண்ணை உங்கள் பிள்ளை இலவசமாக அழைத்து, அடையாளம் காண முடியாத நபராக ஒருவருடன் பேசலாம். உங்கள் நாட்டில் உதவியைப் பெற Child Helpline International அல்லது United for Global Mental Health என்பதைப் பார்வையிடுங்கள்.
UNICEF: உங்கள் பதின்மவயதினர் மனநல உதவியைக் கண்டறிய அவர்களுக்கு எப்போது உதவுவது
5. எதிர்காலத்தில் உங்கள் பிள்ளையைப் பாதுகாக்க உதவும் விதம்
டிஜிட்டல் யுகத்தில் பிள்ளைகளை வளர்ப்பது எளிதான காரியம் அல்ல, ஆன்லைனில் பெறும் எதிர்மறையான அனுபவம் உங்களுக்கும் உங்கள் பிள்ளைக்கும் பய உணர்வை ஏற்படுத்தலாம். ஆன்லைனில் பாதுகாப்பாக இருப்பதற்கான வழிகளை ஒன்றாகச் சேர்ந்து ஆய்வு செய்வதற்கான ஒரு வாய்ப்பாக நடந்தவற்றைப் பயன்படுத்த முயற்சி செய்யுங்கள், மேலும் உங்கள் பிள்ளை எந்தவொரு சவாலையும் எதிர்கொள்ள உதவும் விதமாக நீங்கள் எப்போதும் அவர்களுக்காக இருக்கிறீர்கள் என்ற எண்ணத்தை வலுப்படுத்துங்கள்.
உங்கள் குடும்ப விதிகளை மீண்டும் பார்வையிடுங்கள்: உங்கள் பிள்ளை யாருடன் எப்படித் தொடர்பு கொள்கிறார்கள், அவர்கள் ஆன்லைனில் பதிவிடுவதை யார் பார்க்கலாம், எந்தத் தளங்கள் அல்லது பகிர்வை அவர்கள் அணுகலாம் என்பதைப் பற்றி உங்கள் பிள்ளையுடன் பேசுங்கள். அவர்களின் பாதுகாப்பு மற்றும் நல்வாழ்வே உங்களின் மிகப்பெரிய கவலையாக உள்ளது என்பதையும், மேலும் கேள்விகள் ஏதேனும் இருந்தால் அல்லது பிரச்சனைகள் குறித்து அவர்கள் எப்போதும் உங்களிடம் அல்லது பிற நம்பகமான பெரியவரிடம் வரலாம் என்பதையும் அவர்களுக்குத் தொடர்ந்து நினைவூட்டுங்கள்.
இளம் பிள்ளைகளுக்கானவை: செயலிகள் மற்றும் கேம்கள் உங்கள் பிள்ளையின் வயது மற்றும் வளர்ச்சிக்கு ஏற்றவையாக உள்ளன என்பதை உறுதிப்படுத்துங்கள். தகாத பகிர்வைத் தடுக்கவும் சில செயலிகள் அல்லது வலைதளங்களுக்கான அணுகலைக் கட்டுப்படுத்தவும், உங்கள் இணைய சேவை வழங்குநர் மற்றும் சாதனங்களில் உள்ள பெற்றோர் கட்டுப்பாடுகள் மற்றும் அமைப்புகளைச் சரிபாருங்கள்.
பதின்மவயதினருக்கானவை: அவர்களுக்குப் பிடித்த தளங்கள், செயலிகள் மற்றும் கேம்களில் உள்ள பாதுகாப்பு அமைப்புகளை ஒன்றாகச் சேர்ந்து உலாவுங்கள். உங்களுக்கு இருக்கும் ஏதேனும் கவலைகள் குறித்து அவர்களிடம் வெளிப்படையாக இருங்கள் மற்றும் அவர்கள் சொல்வதைச் செவிமடுத்திடுங்கள்.
UNICEF: உங்கள் குடும்பத்திற்கான ஆரோக்கியமான டிஜிட்டல் பழக்கங்களை உருவாக்குவதற்கான 10 வழிகள்
குடும்ப மையத்தில் உள்ளFacebook மற்றும் Instagram இல் மேற்பார்வை, பாதுகாப்பு மற்றும் நல்வாழ்வு பற்றி மேலும் அறிக.
தனியுரிமை அமைப்புகளைச் சரிபார்த்திடுங்கள்:உங்கள் பிள்ளை அணுகும் சாதனங்கள், சமூக ஊடகங்கள், கேம்கள் மற்றும் பிற ஆன்லைன் கணக்குகளில் உள்ள தனியுரிமை அமைப்புகளைச் சரிபார்த்திடுங்கள். தரவுச் சேகரிப்பு மற்றும் சாதனங்களைச் சமீபத்திய மென்பொருள் மூலம் புதுப்பித்த நிலையில் வைத்திருக்கும் வகையில் தனியுரிமை அமைப்புகளை அமைக்க வேண்டும்.
இளம் பிள்ளைகளுக்கானவை: நண்பர்கள் அல்லது குடும்பத்தினர் மட்டுமே அவர்களுடன் ஆன்லைனில் தொடர்பு கொள்ள முடியும் என்பதைச் சரிபாருங்கள்.
பதின்மவயதினருக்கானவை: அவர்களுக்குப் பிடித்த தளங்களில் என்னென்ன தனியுரிமை அமைப்புகள் உள்ளன என்பதை ஒன்றாகச் சேர்ந்து பார்வையிடுங்கள். இவற்றைத் தொடர்ந்து சரிபார்த்து தேவைக்கேற்ப மாற்றியமைக்க அவர்களை ஊக்குவித்திடுங்கள்.
UNICEF: பெற்றோருக்கான தனியுரிமைச் சரிபார்ப்புப் பட்டியல்
Facebook, Instagram மற்றும் Meta Horizon இல் உள்ள தனியுரிமை அமைப்புகளைப் பற்றி மேலும் அறிக மற்றும் Facebook இல் உள்ள தனியுரிமைச் சரிபார்ப்பு போன்ற கருவிகளை பயன்படுத்திப் பாருங்கள்.
பகுத்தறியும் சிந்தனைக்கு உதவியாக இருங்கள்: ஆன்லைனில் சந்தேகத்திற்கிடமான அல்லது தீங்கு விளைவிக்கும் நடத்தையை அடையாளம் காண்பது பற்றி உங்கள் பிள்ளையுடன் பேசுங்கள். கண்ணியத்துடனும் மரியாதையுடனும் நடத்தப்படுவதற்கு அனைவருக்கும் உரிமை உண்டு என்பதையும், பாரபட்சமான அல்லது தகாத நடத்தையை ஒருபோதும் ஏற்றுக்கொள்ள முடியாது என்பதையும் அவர்கள் புரிந்துகொள்வதை உறுதிப்படுத்திக் கொள்ளுங்கள்.
இளம் பிள்ளைகளுக்கானவை: ஆன்லைனில் உள்ள அனைவரும் நம்பகமானவர்கள் அல்ல என்பதை விளக்கி, யாருடன் தொடர்பு கொள்கிறோம், எதைக் கிளிக் செய்கிறோம் என்பதில் கவனமாக இருக்க வேண்டும் என்பதையும் விளக்குங்கள். அவர்கள் எப்போதாவது ஒரு விஷயத்தை "தவறு" என்று உணர்ந்தால் உங்களிடம் வருமாறும், எனவே நீங்கள் அதனை ஒன்றாகச் சேர்ந்து சரிசெய்யலாம் என்றும் அவர்களுக்கு நினைவூட்டுங்கள்.
பதின்மவயதினருக்கானவை: அவர்களின் வளர்ந்து வரும் சுதந்திரம் மற்றும் நல்ல முடிவுகளை எடுக்கும் அவர்களின் திறனிற்கு உதவும் விதமான வழிகளைக் கண்டறியுங்கள். ஆன்லைனில் அவர்கள் பார்ப்பதையும் பகிர்ந்து கொள்வதையும் பற்றிச் சிந்திக்குமாறு அவர்களை ஊக்கப்படுத்துங்கள். அவர்கள் எதிர்கொண்ட விஷயங்களைப் பற்றிக் கேளுங்கள் - அவர்கள் எப்போதாவது தனிப்பட்ட தகவல்களை ஆன்லைனில் பகிர்ந்து கொள்ள வேண்டிய நெருக்கடியை எதிர்கொண்டிருக்கிறார்களா அல்லது அத்தகவல்களை வேறு ஒருவர் வைத்திருப்பதை அறிந்திருக்கிறார்களா? ஆன்லைனில் சிக்கலான நடத்தையை எதிர்கொண்டால் அவர்கள் என்ன செய்ய வேண்டும்?
ஈடுபாட்டுடன் இருங்கள்: தொழில்நுட்பம் தொடர்ந்து மாறிக்கொண்டே இருக்கிறது, உங்கள் பிள்ளை வளருகையில், அவர்களின் ஆன்லைன் செயல்பாடுகளும் மாறும். புதிய தளங்கள், கேம்கள் மற்றும் செயலிகளைக் குடும்பமாக ஒன்றாகச் சேர்ந்து உலாவுங்கள். ஒவ்வொருவரும் எவ்வாறு ஈடுபட்டுள்ளார்கள் என்பதை ஒன்றாகச் சேர்ந்து கண்டறியுங்கள், தொடர்புடைய பிரச்சினைகளைப் பற்றி விவாதியுங்கள், புதிய விஷயங்களைக் கற்றுக் கொள்ளுங்கள், வேடிக்கையையாக மகிழ்ந்திருங்கள்.
உங்கள் பிள்ளையின் ஆன்லைன் வாழ்வின் செயல்பாடுடையவராக அங்கம் வகிப்பது, எதிர்காலச் சவால்களைக் கடந்துச் செல்ல அவர்களுக்கு உதவுவதோடு மட்டுமல்லாமல், ஒவ்வொரு வாய்ப்பையும் பயன்படுத்திக்கொள்ளவும் அவர்களுக்கு உதவும்.
இந்தக் கட்டுரை UNICEF உடன் இணைந்து உருவாக்கப்பட்டது. பிள்ளைவளர்ப்பு பற்றி வல்லுநரின் கூடுதல் உதவிக்குறிப்புகள் மற்றும் வழிகாட்டுதல்களுக்குப் பார்வையிடுங்கள்:UNICEF Parenting.
UNICEF எந்த நிறுவனத்தையும், பிராண்டையும், தயாரிப்பையும் அல்லது சேவையையும் அங்கீகரிக்கவில்லை.
தொடர்புடைய உதவி வளங்கள்
பாலியல் ரீதியான மிரட்டலை நிறுத்துதல்: பெற்றோருக்கான உதவிக் குறிப்புகள் | Thorn
மேலும் படித்திடுக
