Justin W. Patchin en Sameer Hinduja
Wat moet jy doen as jy uitvind dat jou tiener ander tieners aanlyn afgeknou het? Hierdie scenario is op vele wyses meer uitdagend as wanneer jou tiener die teiken was. Dit kan moeilik wees om te erken dat jou tiener dalk iets gedoen of gesê het wat ander seergemaak het, maar wees ontvanklik. Aanvaar die werklikheid as ’n ouer of versorger dat enige tiener dalk slegte keuses kan maak gegewe sekere omstandighede, ten spyte van ons beste pogings om hulle ander te onderrig. Ouers en versorgers moet in die begin hierdie probleem soos enige ander benader: met ’n kalm en oop kop. As jy ontstoke is (wat jy heel waarskynlik in die begin sal wees), neem ’n paar diep asemteue en keer terug na die kwessie wanneer jy ’n bietjie gekalmeer het. Hoe jy op die huidige situasie reageer, sal die weg berei vir hoe jou tiener met jou in die toekoms sal kommunikeer.
Vind uit wat gebeur het
Eerstens is dit belangrik dat jy verstaan presies wat gebeur het. Wie is geteiken? Was daar enigiemand anders betrokke, óf as ’n teiken, getuie, óf aggressor? Hoe lank gaan dit nou al aan? Is daar ’n geskiedenis of problematiese interaksie waarvan jy moet weet? Wat was die motivering of oorsprong van die skadelike handeling(e)? Probeer om soveel as wat jy kan te wete te kom oor wat gebeur het. Praat met jou tiener. Kry hul volledige kant van die storie. Hopelik sal hulle oop en tegemoetkomend wees, maar dikwels sal hulle nie. Dit is hoekom dit belangrik is om die situasie op jou eie te ondersoek. Baie jeug raak betrokke met kuberafknouery om wraak te neem oor iets wat iemand anders eerste gedoen het. Maak seker dat jou tiener weet dat hulle na jou toe kan kom en enige kwessie kan bespreek wat hulle met hul portuurgroep het. Hopelik kan dit die ontwikkeling van moontlike konflikte onderbreek voordat dit ’n kookpunt bereik.
Wenke om jou tiener se kuberafknouery stop te sit
- Vind uit wat gebeur het en hoekom
- Maak seker dat hulle verstaan hoe skadelik dit is
- Pas logiese gevolge toe
- Hou toesig oor hulle aanlyn aktiwiteite
Pas logiese gevolge toe
As volwassenes weet ons dat alle gedrag gevolge dra – positief en negatief. ’n Natuurlike gevolg is iets wat natuurlik of outomaties gebeur as gevolg van ’n spesifieke gedrag (sonder dat iemand intree). As iemand byvoorbeeld hulle hand op ’n warm stoofplaat sit, sal hulle brand. Sommige natuurlike gevolge is egter te veel van ’n risiko. ’n Tiener wat byvoorbeeld dronk bestuur, kan dalk ’n ongeluk maak en hulleself of iemand anders se dood veroorsaak. Vir hierdie tipe gedrag is dit beter om die natuurlike gevolg voor te spring deur ’n logiese gevolg te gebruik wat direk verband hou met die potensiële risiko wat betrokke is. Ons wil nie hê ons tieners moet drink en bestuur nie, so as hulle riskant optree as dit by alkohol kom, vat ons dalk vir ’n rukkie die kar weg of laat hulle slagoffers van karongelukke in die hospitaal besoek. Vir die maksimum effek moet die gevolg so gou as moontlik ná die gedrag plaasvind (omdat natuurlike gevolge dikwels onmiddellik is). Dis noodsaaklik dat jou tiener ’n duidelike verband tussen die gedrag en die straf kan sien. Dieselfde benadering kan gebruik word wanneer ons ons tieners vir onvanpaste aanlyn aktiwiteit dissiplineer. As hulle goed op sosiale media sê wat ander mense seermaak, het hulle dalk vir ’n paar dae ’n blaaskans van tegnologie nodig. As hulle lelike boodskappe stuur, kan hulle vir ’n rukkie die reg verloor om hulle fone te gebruik. Maak seker dat jy verduidelik waarom die gedrag onvanpas is en wys wat sommige van die natuurlike gevolge sou kon wees (die teiken kry seer, jou tiener se aanlyn reputasie ly skade, hulle kan tydelik of permanent uit die skool geskors word, ’n jeugmisdaadrekord, ens.).
Oor die algemeen moet ouers versigtig dink oor hoe hulle op kuberafknouery reageer – veral wanneer hulle tiener die aanvaller is. Niemand wil hê dat die gedrag moet voortgaan nie, daarom moet spesifieke stappe gedoen word. Elke tiener en elke insident is anders, en daarom is dit belangrik om soveel as moontlik uit te vind oor wat gebeur het sodat jy op ’n deurdagte manier kan reageer.
Volg ons
